Pájina aktualizada iha 07:54h, kinta-feira 03 Jullu

Primeiru-ministru mantén objetivu hodi kria empregu rihun 300 iha lejislatura

29 de Junho de 2020, 23:49

Primeiru-ministru mantén objetivu hodi kria empregu rihun 300 durante lejislatura atual, ne'ebé hotu iha 2023, no kresimentu ekonómiku ba 7% tinan-tinan, haktuir liña orientador sira hosi Orsamentu Jeral Estadu (OJE) tinan 2020 nian.


Objetivu rua ne'e halo parte hosi livru foun ida ho "liña orientasaun sira ba elaborasaun hosi proposta Orsamentu 2020-2023", prepara hosi gabinete Taur Matan Ruak nian iha fulan ne'e no serve hanesan mata-dalan ba preparasaun hosi konta públika sira tinan ne'e nian.

Timor-Leste iha duodésimu dezde 01 Janeiru, rejista ona kontrasaun ekonómiku ida iha 2018 tanba krizi polítika iha nasaun no rekuperasaun oituan iha tinan liubá, nune'e, tanba pandemia COVID-19, sei hotu 2020 ho rekua foun ida hosi PIB nasional.

Governu agora prepara hela proposta foun ida hosi OJE ba tinan ne'e - ida dahuluk xumba ona iha Janeiru iha parlamentu -, ne'ebé, tuir primeiru-ministru, sei haruka ba parlamentu iha Setembru.

Maski hosi kontestu ekonómiku foun ho krizi polítika marka tinan rua dahuluk hosi ezekutivu - ne'ebé kompletu de'it iha semana liubá - dokumentu foun hosi liña orientador sira, ne'ebé maka Lusa iha asesu, hanesan tebes ho dokumentu ne'ebé lansa hosi primeiru-ministru iha tinan ida liubá, mantén promesa hodi kria empregu rihun 300 to'o tinan 2023 ka rihun 60 tinan-tinan.

Haree katak númeru ne'e la kumpri iha tinan rua dahuluk hosi governasaun - no tanba krizi polítika no pandemia, ekonomista sira hatudu katak iha lakon empregu sira -, kumpri promesa ne«e sei obriga atu kria kuaze totalidade hosi empregu rihun 300 to'o eleisaun tinan 2023.

Informasaun kona-ba área empregu iha Timor-Leste hanesan ladún iha konfiansa, maski inkéritu foun kona-ba serbisu operáriu sira, ne'ebé halo iha 2016, indika katak forsa serbisu nian iha momentu ne'eba iha ema rihun 339, rihun 304 konsidera hanesan empregadu.

Hosi rihun 304 ne'e, 71% resin, tuir estudu haneasn, iha ekonomia informal no 58% hosi serbisu sira ne'e konsidera hanesan "vulnerável".

Iha nível sira hosi ekonomia formal, Sistema Seguransa Sosial iha agora daudaun rejista traballador rihun 82 resin, rihun 32 resin hosi setor privadu.

Iha ámbitu seluk, dokumentu hosi liña orientador sira, mantén hanesan objetivu kresimentu anual ida ekonomia nian hosi 7%, valor ne'ebé la kumpri ona iha tinan ruma hosi lejislatura nian to'o agora.

Hahú hosi inísiu tinan ne'e, no haktuir hosi Banku Sentral Timor-Leste (BCTL), ekonomia timoroan rekua 6%.

Iha nível jeral, dokumentu muda de'it kór kapa nian bainhira kompara ho testu hosi Juñu 2019 nian - pasa hosi kór bandeira timoroan nian ba kór metan - mantén kompromisu sira ne'ebé hanesan hodi investe hodi hadi'a kondisaun sira bee nian, habitasaun, edukasaun, formasaun, kultura, patrimóniu, juventude ho desportu.

Kona-ba ekonomia, tuir liña prioritáriu 2020 nian, Governu hakarak aumenta baze ekonómiku nasaun nian, promove aumentu sustentadu hosi rendimentu sira, estimula inisiativu privadu sira ho hadi'a setor produtivu nasional, liuliu agrikultura, agropekuária ho peska.

Iha setor primáriu, Governu hakarak apoia produsaun maibé mós "transporte, distribuisaun, embalamentu ho armazenamentu hosi produtu agríkola sira", ajuda fortalese ligasaun entre produtor sira ho merkadu.

Governu hakarak fortalese mós kapasidade hosi indústria finanseira, "fasilita atividade komersial sira", iha tempu hanesan hadi'a "transparénsia, responsabilidade, efisiénsia ho sustentabilidade" hosi konta públika.

Entre prioridade ekonómiku sira iha "hadi'ak konektividade nasional", iha nível hosi infraestrutura baze sira (estrada sira, portu ho ponte sira, no seluk tan), nune'e mós hadi'a lojístika ho rede sira telekomunikasaun nian, liuliu fibra ótika tasi no rai nian.

Lusa

 


Comentários

Critério de publicação de comentários