Pájina aktualizada iha 15:38h, domingu 09 Agostu

Grupu organizadu lansa kampaña hodi defende demokrasia iha Brazil

30 de Junho de 2020, 00:28

Iha loron-segunda ne'e, organizasaun ho movimentu sosial brazileiru sira hamutuk 60 resin lansa ona kampaña ida hodi defende demokrasia iha Brazil, ne'ebé sira konsidera hanesan hetan ameasa hosi alegadu atake sira ba instituisaun sira ne'ebé maka promove iha Governu lidera hosi Prezidente Jair Bolsonaro.


"Asaun hanesan resposta ida ba situasaun iha nasaun, ne'ebé eziji uniaun hosi ema hotu hodi defende demokrasai", haktuir hosi entidade sira iha manifestu ne'ebé lansa ona kampaña.

Signatáriu sira inklui Orden Advogadu sira Brazil nian (OAB), Oxfam - Komité Oxford ba Alíviu Hamlaha nian, Fundu Mundial ba Natureza (WWF), Artikulasaun hosi Povu Indíjena sira hosi Brazil (APIB) ho sindikatu prinsipal sira Brazil nian.

Grupu denunsia ona katak demokrasia brazileiru "hetan ameasa hosi atake beibeik no estraordináriu hasoru instituisaun sira, ba imprensa ho ba direitu sira hosi sidadaun sira ne'ebé konsagra iha Konstituisaun".

Durante semana sira, grupu sira hosi estrema-direita ne'ebé kompostu hosi apoiante sira Jair Bolsonaro nian organiza ona manifestasaun oioin iha Brazília hodi eziji taka Kongresu no Supremu Tribunal Federal (STF) liuhosi intervensaun militar ida ne'ebé lidera hosi xefe Estadu atual.

Asaun sira ne'e, deskritu hanesan "antidemokrátiku sira" hosi Ministériu Públiku Federal, ne'ebé maka Bolsonaro rasik partisipa ona iha okaziaun oioin, hamosu nafatin klima konfrontu ida entre Governu ho poder lejislativu sira ho judisiáriu sira iha nasaun súl-amerikanu.

Ho iritasaun hosi atake sira, STF, instánsia ikus hosi Justisa brazileiru, hahú investiga partisipante balun hosi protestu sira ne'ebé hanesan mós suspeitu hodi espalla notísia falsu sira ho ameasa sira hasoru juís sira tribunal nian.

Investigadu balun, membru hosi grupu estremista ida ho naran "300 hosi Brazil", kaer ona no agora iha hela liberdade kondisional.

Tuir peskiza ida hosi Institutu Datafolha, ne'ebé fó sai iha loron-segunda ne'e, maioria hosi ema brazileiru sira konsidera risku ida ba demokrasia ba propaganda hosi notísia falsu sira (81%) no manifestasaun sira hosi apoiante sira Bolsonaro nian hasoru STF ho Kongresu nasaun nian (68%).

Iha parte seluk, organizasaun sosial sira destaka iha manifestu hodi defende demokrasia ne'ebé lansa iha loron-segunda ne'e katak moris mós hetan ameasa tanba "falta kordenasaun" hosi Governu Bolsonaru nian iha kombate hasoru pandemia ne'ebé hamosu hosi koronavírus foun ne'ebé hamate ona ema hamutuk 57,622 no infeta ona ema millaun 1,34 iha Brazil.

Signatáriu sira hosi maniefstu denunsia katak emerjénsia ne'ebé hamosu hosi COVID-19 agrava "situasaun krítika hosi saúde ho ekonomia" iha Brazil, kria tan terus ba traballador sira, populasaun vulnerável sira, ba mikro emprezáriu ho emprezáriu ki'ik sira.

Lansamentu hosi kampaña sei inklui ezibisaun iha fatin koñesidu sira hosi kapital rejional balun Brazil nian.

Grupu ne'ebé defende demokrasia brazileira organiza mós atividade oioin hanesan konferénsia sira, asaun kultural sira ho demontrasaun virtual sira iha loron 04 ho 05 Jullu.

Lusa

 


Comentários

Critério de publicação de comentários