Pájina aktualizada iha 19:53h, kinta-feira 24 Setembru

COVID-19: UE loke fali fronteira sira ba nasaun 15, la inklui EUA ho Brazil

01 de Julho de 2020, 01:31

Estadu-membru sira hosi Uniaun Europeia desidi ona, iha loron-tersa ne'e, hodi loke fali externa hahú loron-kaurta ba nasaun hamutuk 15 ne'ebé nia situasaun epidemiolójiku COVID-19 nian konsidera hanesan satisfatóriu, iha lista ne'e la inklui nasaun sira hanesan Estadus Unidus ho Brazil.


Lista hosi nasaun datoluk sira ne'ebé maka sei permiti hahú fali viajen "la indispensável sira" ba Europa, ne'ebé diskuti ona durante loron hirak ikus ne'e hosi embaixador sira hosi nasaun 27 iha Bruxelas no adopta formalmente iha loron-tersa ne'e liuhosi prosedimentu eskritu hosi Estadu-membru sira, inklui Arjélia, Austrália, Kanadá, Jeórjia, Japaun, Montenegro, Maroko, Nova Zelándia, Ruanda, Sérvia, Koreia-Súl, Tailándia, Tunízia, Uruguai ho Xina, maibé Xina tenki sujeitu ba konfirmasaun hosi mutualidade nian ka bainhira nasaun aziátiku loke fali nia fronteira sira ba UE.

Hanesan previstu ona, haree ba situasaun epidemiolójiku atual, seidauk simu autorizasaun hodi hahú fali ligasaun sira ba Europa maka nasaun sira hanesan Estadus Unidus, Rúsia ho Índia no Brazil, la inklui mós iha lista Nasaun Afrikanu sira ho Lian Ofisial Portugeza (PALOP) no Timor-Leste.

Iha komunikadu, Konsellu aponta katak lista, elabora ho baze iha kritériu oioin - no adopta iha loron-tersa ne'e hosi maioria kualifikadu - sei iha revizaun semana rua dala ida no bele atualizadu, bele halakon ka introduz fali limitasaun sira hosi viajen totalmente ka parsialmente ba nasaun datoluk espesífiku ne'ebé inklui iha lista bainhira iha mudansa iha situasaun epidemiolójiku nian.

"Bainhira situasaun iha nasaun ida agrava lalais, sei foti lalais desizaun ida", indika hosi Konsellu UE nian.

Hodi elabora lista hosi nasaun sira ne'ebé permiti atu hahú fali ligasaun sira ba Europa, determina ona kritériu sira hanesan númeru hosi kazu kontájiu sira iha loron 14 ikus ne'e, no tuir populasaun rihun 100, idéntiku ka ki'ik liu média UE nian, observa iha estabilizasaun ida ka diminuisaun hosi tendénsia hosi kazu foun sira iha períudu ne'e bainhira kompara ho loron 14 antes, no resposta iha nível global sira ba pandemia, haree mós ba aspetu sira hanesan teste sira ne'ebé hala'o, medida kontensaun nian, vijilánsia ho tratamentu sira.

Konsellu aponta katak haree mós ba prinsípiu hosi mutualidade nian, "ho forma regular ida no baze ida hosi análize kazu ba kazu". Iha lista dahuluk ne'e, loke fali fronteira sira ba Xina sei depende nune'e hosi abertura hosi fronteira sira Xina nian ba sidadaun komunitáriu sira.

Ba nasaun datoluk sira ne'ebé sei iha limitasaun, sei izentu ba sidadaun sira UE nian ho familiar sira, rezidente tempu kleur iha Uniaun ho sira nia família no viajante sira ho funsaun sira ka nesesidade espesial sira.

Konsellu UE nian - ba instituisaun ne'ebé halibur Estadu-membru hamutuk 27 - rekoñese katak rekomendasaun hosi levantamentu parsial ka gradual hosi fronteira externa sira la'ós hanesan dalan ida legalmente vinkulativu, tanba jestaun hosi fronteira sira hanesan kompeténsia hosi autoridade nasional sira, maibé akonsella katak "Estadu-membru ida labele desidi halakon limitasaun hosi viajen sira ba nasaun sira ne'ebé la inklui iha lista antes desidi ho dalan kordenadu" ho nasaun sira seluk.

Nesesidade hosi kordenasaun ne'e, ne'ebé defende antes hosi Komisaun Europeia, haree ho baze hosi, iha kuadru hosi sirkulasaun livre iha fatin Schengen nia laran, asaun hosi Estadu-membru ida ne'ebé labele evita reflexu iha nasaun sira seluk.

UE taka ona nia fronteira externa sira ba viajen "la indispensável" tomak iha 17 Marsu, iha kuadru hosi esforsu sira hodi trava propagasaun COVID-19 nian.

Transmiti hosi koronavírus foun ida ne'ebé hetan iha final Dezembru, iha Wuhan, sidade ida iha sentru Xina nian, COVID-19 halo ona ema 505.500 resin mate no infeta ona ema millaun 10,32 iha nasaun ho teritóriu hamutuk 196, haktuir balansu ne'ebé halo hosi ajénsia franseza AFP.

Hafoin Europa susede Xina hanesan sentru pandemia nian iha Fevereiru, agora kontinente amerikanu maka iha kazu konfirmadu maka'as no vítima mortal barak.

Lusa

 


Comentários

Critério de publicação de comentários