Pájina aktualizada iha 15:12h, domingu 09 Agostu

COVID-19: PAM alerta ba risku hosi pandemia iha kondisaun alimentar sira iha Timor-Leste

29 de Julho de 2020, 20:26

Responsável hosi Programa Alimentar Mundial nian iha Timor-Leste alerta ona, iha loron-kuarta ne'e, ba risku sira atu pandemia COVID-19 agrava kondisaun alimentar sira ho nutrisaun nian hosi parte ida hosi populasaun timoroan nian ne'ebé hanesan ona fraku.


"Timor-Leste la produz hahán sufisiente sira hodi alimenta populasaun. 70% hosi foos ne'ebé konsumidu hanesan importadu maibé ho COVID-19 nasaun fornesedor barak suspende ona esportasaun sira", hatete hsi Dangend Liu.

"Maski nune'e, COVID-19 bele serve hanesan alerta ba nesesidade hosi polítika agríkola adekuadu ida, hodi evita atu krizi sira hanesan ne'e bele transforma iha krizi alimentar sira", nia destaka.

Dageng Liu ko'alia iha enkontru ida ho jornalista sira iha Díli hodi hato'o kona-ba programa oioin ne'ebé maka PAM dezenvolve hela iha Timor-Leste dezde hahú operasaun iha nasaun iha tinan 1999.

Asaun hosi Programa sentra hela, iha tinan hirak ikus ne'e, iha apoiu ba asaun hosi Governu hodi hetan objetivu sira hosi dezenvolvimentu sustentável, liuliu halakon hamlaha ho malnutrisaun.

Liu destaka katak kestaun nutrisaun hanesan importante tebes liuliu entre labarik sira, ho Timor-Leste rejista nafatin nível aas tebes hosi nanizmu entre labarik sira ne'ebé seidauk to'o tinan lima, iha rejiaun Ázia ho Pasífiku.

"Kestaun iha relasaun ho alimentasaun, maibé mós ho kestaun sira hanesan saúde, bee ho saneamentu ho mudansa sira komportamentu nian", nia afirma.

Dageng Liu no mós sekretáriu Estadu Komunikasaun Sosial nian, Merício Akara, ne'ebé partisipa iha enkontru, apela ona ba jornalista sira hodi ajuda iha defeza ba kestaun sira ne'e.

Merício Akara hatete katak Governu foti ona desizaun polítika sira iha sentidu hodi "hamenus efeitu ekonómiku sira hosi pandemia" no agora iha hela faze ezekusaun hosi medida sira ne'e, afirma fali nia dedikasaun hodi ativa fali ekonomia nasional.

Iha tempu hanesan, Akarak husu ona ba jornalista sira atu fó destake balun ba "notísia pozitiva sira" kona-ba nasaun, inklui iha kestaun sira hanesan asaun hosi PAM ho entidade sira seluk hodi kombate problema sira nutrisaun nian iha nasaun.

PAM hahú ona nia operasaun sira iha Timor-Leste iha Outubru 1999, ho orsamentu ida hamutuk dolar millaun 26,4 ba operasaun emerjénsia hosi apoiu ba deslokadu internu sira tanba violénsia sira ne'ebé akontese hafoin referendu 30 Agostu iha tinan 1999.

Operasaun dahuluk kalkula distribuisaun ba ajuda alimentar ho tonelada rihun 26 resin ba ema rihun 400 resin durante fulan neen.

Organizasaun mantén nia apoiu iha 2002 no 2003 kanaliza ona apoiu ba komunidade sira ne'ebé afetadu ho rai-maran ho inundasaun sira.

Entre tinan 2004 ho 2007, PAM lansa ona projetu “Invest in the Future” konsentra iha Programa Alimentasaun Eskolar, iha saúde maternoinfantil ho preparasaun ho resposta ba situasaun sira emerjénsia nian, apoia deslokadu internu sira.

Iha tinan sira tuirmai, no to'o 2011, PAM serbisu hamutuk ona ho Ministériu Turizmu, Komérsiu ho Indústria hodi apoia iha fortalesimentu hosi kondisaun alimentar lokal sira, diresionadu ba populasaun fraku sira no ne'ebé maka moris ho inseguransa alimentar.

Organizasaun apoia ona estabelesimentu dahuluk hosi produsaun Timor Vita.

Entre 2012 ho 2014, PAM transfere ona responsabildiade hosi Programa Alimentasaun Eskolar ba Governu Timor-Leste, sentra iha asisténsia téknika iha dezenvolvimentu hosi kapasidade alimentar ho jestaun hosi kadeia abastesimentu nian.

To'o 2017, organizasaun implementa ona programa ida diresionadu ba suplementu alimentar sira iha munisípiu neen hodi apoia feto sira ho labarik sira no fornese mós suplementu alimentar sira ba populasaun ne'ebé afetadu ho El Niño, produz Relatóriu Revizaun hosi Estratéjia Nasional ba Zero Hamlaha.

Timor-Leste laiha ona kazu ativu hosi COVID-19 hahú hosi loron 15 Maiu.

Lusa

 


Comentários

Critério de publicação de comentários