Pájina aktualizada iha 15:46h, domingu 09 Agostu

COVID-19: Governu aprova medida sira apoiu ekonómiku nian ba prazu badak

30 de Julho de 2020, 00:35

Iha loron-kuarta ne'e, Governu aprova ona pakote ida hosi medida sira ne'ebé sei aplika iha prazu badak hodi apoia empreza sira, família sira ho traballador sira hosi área informal hodi hamenus impaktu sira hosi krizi ekonómiku ne'ebé mosu tanba pandemia COVID-19.


Medida sira, ne'ebé halo parte iha Planu Rekuperasaun Ekonómika, destina hodi "apoia satisfasaun hosi nesesidade báziku sira hosi sidadaun sira, apoia traballador sira hosi área informal, mantén postu servisu sira ho rendimentu sira no mantén empreza sira iha merkadu", haktuir Governu iha komunikadu.

Medida dahuluk haree ba atribuisaun hosi "konjuntu sasán alimentar sira ho hijiene pesoal importante sira, dezignadu ho naran 'sesta bázika' ka, iha alternativa, vale ida kompras nian ne'ebé fó ba sidadaun tomak ka rezidente sira iha Timor-Leste, sasán sira ne'e, ho preferénsia, hanesan produsaun nasional ka lokal".

Empreza sira ho entidade empregadora sira hosi área privadu "sei iha apoiu ida liuhosi kriasuan hosi subsídiu mensal ida, ho karáter pekuniáriu, sei fó, durante fulan lima, ba entidade empregadora sira ne'ebé hahú fali nia atividade ho forma regular".

Tanba ne'e, labele suspende ka hamenus horáriu normal servisu nian no tenki inskritu iha seguransa sosial ho administrasaun fiskal nian.

Bele benefisia mós "entidade sira ne'ebé, laiha kondisaun sira hodi hahú fali atividade regular, bainhira enkuadra iha área turizmu nian".

Programa apoiu nian haree mós atu entidade empregadora sira sai dispensadu hosi dever pagamentu hosi kontribuisaun sosial sira, relasionadu ho parsela hosi nia kargu, durante períudu ida fulan neen nia laran.

Ikusmai, kria apoiu ida ba traballador sira hosi área informal, "liuhosi kriasaun hosi subsídiu ida ekivale ba 60% hosi valor renumerasaun konvensional ne'ebé konstitui baze hosi insidénsia kontributivu hosi eskalaun dahuluk hosi adezaun fakultativu ba rejimi kontributivu hosi Seguransa Sosial, durante fulan sira Outubru, Novembru ho Dezembru".

Atu bele iha asesu ba apoiu ne'e, benefisiáriu sira "bele rejista iha Seguransa Sosiak iha Agostu ho Setembru tinan 2020, iha kondisaun hodi hala'o pagamentu hosi kontribuisaun sira ne'e ba seguransa sosial durante fulan tolu tuirmai, konta hafoin atribuisaun hosi prestasaun subsídiu ikus".

Timor-Leste laiha kazu ativu sira ba COVID-19 dezde loron 15 Maiu, kompleta iha final Juñu períudu ida fulan tolu ba estadu emerjénsia.

Situasaun COVID-19 nian, ne'ebé akontese iha kontestu hosi krizi polítika boot ida iha nasaun - ne'ebé lahó Orsamentu Jeral Estadu (OJE) nian dezde inísiu tinan ne'e - agrava ona krizi ekonómiku iha nasaun.

Pandemia COVID-19 halo ona ema rihun 660 resin mate no infeta ona ema millaun 16,7 resin iha nasaun ho teritóriu hamutuk 196, haktuir balansu ida ne'ebé halo hosi ajénsia notísia France-Presse (AFP).

Moras ne'e transmiti hosi koronavírus foun ida ne'ebé hetan iha Wuhan, sidade ida iha sentru Xina nian, iha final Dezembru liubá.

Lusa

 


Comentários

Critério de publicação de comentários