Pájina aktualizada iha 14:16h, domingu 09 Agostu

Governu hahú konsulta públika kona-ba konstrusaun fatin hodi soe foer iha kapital

31 de Julho de 2020, 23:50

Iha loron-kuarta, Governu hahú konsulta públika antesipadu ba estudu hosi impaktu ambiental ba projetu transformasaun hosi lixeira atual Tibar nian, iha besik Díli, iha fatin foun ida.


Projetu ida ne'ebé hahú iha 2015, marka ona ho rezisténsia oioin - inklui ideia, ne'ebé ikusmai husik tiha, hodi rekore ba insineradora ida - no ne'ebé hanesan sai urjente liu tanba volume hosi foer ne'ebé simu loron-loron.

Aumentu populasaun iha Díli hamosu presaun ne'ebé nunka akontese iha zona lixeira, ne'ebé loron-loron simu foer tonelada 150 resin, ho defisiénsia maka'as iha sistema hodi rekolla foer, komponente seluk ida hosi projetu.

Foer hanesan problema maka'as ida iha kapital, ho rezidente sira taur foer sira iha fatin ne'ebé la adekuadu - sei iha kuantidade limitadu iha kontentor sira ne'ebé, dalabarak, laiha uzu.

Rekolla rasik halo ho liman, hosi funsionáriu sira ne'ebé tau foer iha kamiaun sira ho kaixa nakloke, depois lori ba Tibar, zona ne'ebé labarik sira ho joven sira buka, iha foer laran, material hodi fa'an ka hodi uza fali.

"Lixeira Tibar nian hanesan depózitu ida iha ár livre no sunu foer sira ho poluisaun iha bee, ho risku ba saúde ba sé maka rekolla foer, proliferasaun hosi insetu sira ho praga hosi animal sira", nota iha termu sira referénsia nian.

"Hein atu remodelasaun ho reabilitasaun hosi fatin Tibar rezolve kestaun sira ne'e, rezulta iha hadi'a kualidade ida ambiente nian, ár nian, bee nian no barullu ho seguransa komunitáriu iha fatin ne'e no iha área sira ne'ebé besik no hasoru ho foer sira ne'ebé la tratadu ka prosesadu", esplika.

Dokumentu preliminar sira rekorda katak populasaun Díli nian aumenta lalais iha dékada ikus ne'e, ultrapasa populasaun rihun 345 haktuir hosi sensu ikus iha tinan 2015.

Ne'e "halo aumentu maka'as ida hosi foer ne'ebé maka produz hosi populasaun sira sidade nian" ho foer barak sidade nian - ne'ebé tau hamutuk ho foer hosi zona sira seluk nasaun nian ne'ebé maka mota lori - "to'o iha tasi-ibun sira no iha sistema drenajen nian, hamosu beibeik inundasaun sira".

Iha prazu naruk, Governu hakarak implementa sistema "adekuadu ho sustentável ida hosi jestaun foer sólidu urbanu nian", moderniza rekolla ho reabilita lixeira, ikusmai bele avansa, bainhira viável iha nível komersial, ba projetu sira resiklajen nian.

"Hamutuk ho di'ak sira iha rekolla foer sira nian, sei iha mós impaktu pozitivu la diretu hosi kualidade di'ak moris nian no kualidade urbana iha sidade Díli nian", nota.

Objetivu hosi konsulta públika maka rona opiniaun sira kona-ba objetivu sira, metodolojia téknika ho proposta hosi EIA ne'ebé presiza antes implementa projetu "Reabilitasaun ho Modernizasaun hosi Depózitu Foer Tibar nian" (TDRUP).

Konsulta públika enkomenda hosi Kámara Munisipal Díli, hosi Ministériu Administrasaun Estatal ho Diresaun Jeral hosi Planeamentu Urbanu.

Dokumentu sira iha nível referénsia nian, ne'ebé maka Lusa iha asesu, hatudu katak Governu "sei investe iha obra sira hosi dezeñu tékniku ho ekipamentu espesializadu sira hodi muda fatin ne'e iha ateru sanitáriu ne'ebé kaer no jere tuir padraun modernu internasional sira".

Autoridade sira konsidera katak fatin soe foer nian iha ár livre "iha efeitu negativu sira ba saúde públika ho ambiente hosi área sira ne'ebé besik fatin ne'e" no reabilitasaun sei hadi'a ambiente tomak kapital nian.

TDRUP inklui iha Projetu Jestaun hosi Foer Sólidu Díli nian (DSWMP), ne'ebé hahú dezenvolve iha tinan 2015, no iha apoia hosi Banku Aziátiku Dezenvolvimentu (BAD) nian no konsultor sira FCG ho Oásis.

Governu avansa ona ho konkursu ida ba dezeñu, konstrusaun ho operasaun hosi fatin foun ida durante tinan 10, hodi Munisípiu Díli nia naran, ho dezeñu ikus haree ba rezultadu sira hosi EIA.

Zona ne'ebé inklui iha estudu - besik hektar 12 - lokaliza iha suku Tibar, postu administrativu Bazartete, Munisípiu Liquiçá, iha 14 km hosi oeste sentru Díli nian.

Lixeira ne'e uza dezde períudu okupasaun indonéziu nian, laiha kontrolu ruma iha asesu sira, ho "númeru boot hosi ema sira ne'ebé hili foer sira ne'ebé maka sunu foer hodi rekupera metal sira, nune'e halo inséndiu beibeik no volume boot hosi suar sira ne'ebé iha poténsia tóxiku maka'as".

Projetu, ho faze oioin, kalkula reabilitasaun hosi área tolu depozisaun nian ne'ebé halo parte iha sélula hosi ateru sanitáriu, definisaun hosi zona 'tampaun' ida, halakon inséndiu sira no halakon foer, halakon rai to'o klean sentímetru 29 - ka klean liután bainhira iha kontaminasaun - no kria sistema drenajen sira.

Sei rekolla mós gás sira ne'ebé produz, metanu ho dióxidu karbonu, reabilita asesu sira, hadi'a sistema hodi simu foer sira ho prepara zona sira kompostajen nian.

Lusa

 


Comentários

Critério de publicação de comentários