Pájina aktualizada iha 15:24h, segunda-feira 21 Setembru

COVID-19: Timor-Leste rejista kazu foun, dahuluk dezde loron 15 Maiu

04 de Agosto de 2020, 17:29

Iha loron-tersa ne'e, Timor-Leste rejista kazu foun ida hosi COVID-19, kazu dahuluk dezde 15 Maiu, no kazu dala 25 iha nasaun dezde inísiu pandemia nian, hatete hosi fonte sira hosi Ministériu Saúde nian ba Lusa.


Kazu pozitivu hanesan hosi sidadaun indonéziu ida ne'ebé tama liuhosi fronteira rai nian no iha ona kuarentena iha Díli, informa hosi fonte hanesan ba Lusa.

Fonte hosi Governu hatete ona ba Lusa katak kazu foun fó hatene iha loron-tersa ne'e hosi primeiru-ministru, Taur Matan Ruak, durante inísiu hosi Jornada Orsamental, ne'ebé hala'o iha Ministériu Finansa nian lahó prezensa jornalista sira nian.

Fonte hosi Ministériu Saúde hatutan ona ba Lusa katak informasaun sira hosi kazu nian sei hato'o pormenor sira iha konferénsia imprensa iha loron-tersa ne'e hosi ministra Saúde, Odete Belo.

Informasaun preliminar sira hatudu katak hanesan sidadaun indonéziu ida ne'ebé maka tama iha Timor-Leste iha loron 22 Jullu.

Sidadaun indonéziu agora sei transfere ba sentru izolamentu Vera Cruz, iha sentru Díli nian, ne'ebé agora la funsiona dezde pasiente infetadu ikus sira hetan ona alta iha Maiu.

Pasiente infetadu ne'e agora tenki tama iha kuarentena pelumenus loron 14 resin, hodi halo teste foun sira, bele hetan alta de'it bainhira iha teste negativu konsekutivu rua.

Kazu ne'e konfirma liutiha loron ida hafoin Governu aprova iha Konsellu Ministru hodi husu ba Prezidente Repúblika deklarasaun ba períudu foun ida hosi estadu emerjénsia durante loron 30, liutiha fulan ida resin hafoin nasaun hakotu períudu konsekutivu tolu ba loron 30 hosi estadu estraordináriu nian.

Iha komunikadu, Governu esplika katak deklarasaun hakarak permiti "suspensaun ka limitasaun hosi direitu sira sirkulasaun internasional nian, sirkulasaun ho fiksasaun hosi rezidénsia no rezisténsia nian".

"Governu sujere ba señór Prezidente Repúblika (…) deklarasaun Estadu Emerjénsia nian", refere hosi testu, hodi nota katak Governu haree hosi "evolusaun preokupante hosi situasaun epidemiolójiku ho proliferasaun hosi kazu sira ne'ebé rejista hosi kontájiu COVID-19 nian, iha nível rejional ho mós mundial".

Objetivu maka "evita ho neutraliza risku sira propagasaun SARS-Cov-2 nian, proteje nune'e saúde públika ho kapasidade hodi hatán hosi Sistema Nasional Saúde nian", hatutan hosi nota.

Fonte hosi Prezidénsia Repúblika hatete ona ba Lusa katak pedidu Governu nian tama ona iha loron-tersa ne'e, kalkula ba loron-kuarta reuniaun nesesáriu sira hosi Konsellu Estadu ho Konsellu Superior Defeza ho Seguransa, ne'ebé Francisco Guterres Lu-Olo tenki rona antes desidi atu husu ka la autoriza ba parlamentu.

Bainhira halo, Parlamentu Nasional - ne'ebé iha interupsaun - tenki halo reuniaun iha plenáriu estraordináriu, debate atu fó ka la'e autorizasaun ba Prezidente Repúblika.

Iha kazu afirmativu, Francisco Guterres Lu-Olo bele dekreta estadu emerjénsia.

Ikusmai maka Governu halo reuniaun hodi determina limitasaun sira ne'ebé sei aplika iha nasaun.

Informasaun ikus sira hosi Ministériu Saúde hatudu katak agora daudaun iha ema na'in 250 maka iha kuarentena iha instalasaun sira Estadu nian - na'in 212 iha Díli, na'in 31 iha enklave Oecusse no na'in hitu iha Kovalima - ne'ebé tau hamutuk ho na'in 144 iha auto izolamentu, kuaze sira hotu iha Díli.

Governu halo ona teste ho total 4.238, iha final hosi loron-segunda, na'in 167 hein hela rezultadu sira.

Ema na'in 2880 resin maka kompleta ona kuarentena iha Timor-Leste dezde hahú hala'o medida ne'e.

Hahú hosi inísiu pandemia, Timor-Leste rejista ona kazu konfirmadu hamutuk 25, pasiente na'in 24 rekupera ona.

Lusa

 


Comentários

Critério de publicação de comentários