Pájina aktualizada iha 15:16h, segunda-feira 21 Setembru

Relator ONU nian hatete katak pandemia sei kria ema kiak liu millaun 176

12 de Setembro de 2020, 00:37

Espesialista ida iha pobreza hosi ONU alerta, iha loron-sesta ne'e, katak númeru global hosi ema kiak sira bele aumenta ba millaun 176 tanba impaktu hosi COVID-19, refere katak medida sira hosi protesaun sosial ne'ebé Governu sira foti hanesan la sufisiente.


Governu sira fó ona osan iha total dolar biliaun 589 resin ba protesaun sosial iha krizi atual, nune'e reprezenta 0.4% resin hosi Produtu Internu Brutu (PIB) mundial maibé análize hosi relator, ne'ebé fó sai iha loron-sesta ne'e, konsidera katak inisiativu sira ne'e sei la impede aumentu hosi pobreza.

Aumentu ne'e bele to'o iha ema millaun 176, bainhira liña kiak nian konsidera ba rendimentu sira ki'ik liu hosi dolar 3,2 loron-loron, aviza hosi Olivier De Schutter, akadémiku jurídiku belga ne'ebé nomeiadu hosi Konsellu Direitu Ema nian hosi ONU nu'udar relator espesial kona-ba pobreza extrema ho direitu ema sira nian.

Hosi Schutter indika mós katak komunidade nesesitadu sira bele la inklui iha planu sira protesaun nian, tanba detalle sira oinsá programa barak husu atu benefisiáriu sira rejista liuhosi internet, dalan ne'ebé família barak ho rendimentu ki'ik laiha asesu.

Programa sira seluk hamosu "kondisaun imposível sira hodi halo" hosi ema sira ne'ebé iha kondisaun hosi servisu delikadu ka lahó rezidénsia permanente, hanesan kazu hosi traballador migrante sira ka hosi área informal (61% hosi forsa traballu mundial nian), haktuir hosi relator belga.

"Konsekuénsia aat sira hosi krizi iha pobreza seidauk to'o", previni hosi relator ONU nian ne'ebé lamenta mós katak programa barak hosi protesaun sosial nian la halo ona ka labele renova fali bainhira partidu polítiku hosi governu sira muda iha eleisaun foun sira.

Hasoru situasaun no antes Asembleia-jeral ONU nian, ne'ebé sei halibur líder mundial oioin liuhosi telekonferénsia, relator husu ona ba reprezentante sira hosi nasaun oioin atu reforsa planu sira ajuda nian ba grupu sira ne'ebé fraku liu "ho baze iha prinsípiu sira hosi direitu ema sira nian".

Relator konsidera mós katak diminuisaun ekonómiku ne'ebé mosu tanba pandemia hanesan nunka akontese iha tempu sira dame nian dezde Depresaun Boot hosi dékada 1930.

"Família kiak sira hakotu ona rezerva sira ne'ebé sira iha no fa'an ona sira nia ativu", nia hatete hodi subliña katak "impaktu aat sira hosi krizi iha pobreza seidauk to'o".

Pandemia COVID-19 halo ona ema rihun 904 resin mate no iha kazu infesaun hamutuk millaun 28 resin iha nasaun ho teritóriu hamutuk 196, haktuir balansu ne'ebé halo hosi ajénsia franseza AFP.

Moras ne'e transmiti hosi koronavírus foun ida ne'ebé hetan iha Wuhan, sidade ida iha sentru Xina nian, iha final Dezembru.

Medida sira hodi kombate pandemia hapara ona área tomak hosi ekonomia mundial no halo Fundu Monetáriu Internasional (FMI) halo previzaun sira ne'ebé nunka akontese iha nia kuaze tinan 75: ekonomia mundial bele tuun 4,9% iha 2020, prolonga hosi kontrasaun ida hosi 8% iha Estadus Unidus, 10,2% iha zona euro no 5,8% iha Japaun.

Lusa

 


Comentários

Critério de publicação de comentários