Pájina aktualizada iha 15:44h, segunda-feira 21 Setembru

COVID-19: OMS apela atu labele hein ba vasina hodi kontrola pandemia

15 de Setembro de 2020, 00:23

Organizasaun Mundial Saúde (OMS) apela ona, iha loron-segunda ne'e, atu labele hein ba vasina COVID-19 nian hodi kontrola pandemia, rejista katak iha Europa iha liu kazu foun diáriu sira duké iha fulan-Marsu maibé ladún iha vítima mortal.


Halo intervensaun iha sesaun ida komité OMS nian ba Europa, diretor-jeral hosi ajénsia ONU nian, Tedros Adhanom Ghebreyesus, afirma ona katak "bainhira la kontrola kontájiu sira, iha tan ema barak sei mate" no sei aumenta "risku real" hodi iha fali medida sira limitadu liu iha sosiedade.

To'o iha vasina ba moras, nasaun sira bele "uza dalan sira ne'ebé iha ona" hodi kontrola kontaktu sira, "prevene eventu boot amplifikador" sira hosi kontájiu nian, hanesan halibur ema sira iha dimensaun maka'as, no salvaguarda "sira ne'ebé maka fraku liu".

Bainhira iha vasina, tenki hanesan asesivel ho justu ba nasaun tomak, nia repete fali, afirma katak "iha muntu ida ne'ebé interligadu", bainhira sidadaun sira hosi nasaun sira kiak liu la inklui iha vasinasaun, "vírus sei oho nafatin no rekuperasaun ekonómiku mundial sei demora liután".

Ghebreyesus defende mós katak sistema nasional sira saúde nian ne'ebé forte de'it maka konsege hasoru pandemia sira, hodi konsidera katak ne'e hanesan "lisaun ida ne'ebé hamosu terus liu" hosi COVID-19.

Nia konsidera ona katak investimentu iha saúde públiku maka bele sai hanesan ho investimentu sira despeza militar nian hodi garanti seguransa hosi nasaun sira.

Pandemia COVID-19 halo ona, pelumenus, ema na'in 924.968 mate no kazu infesaun hamutuk millaun 29 resin iha nasaun ho teritóriu hamutuk 196, haktuir hosi balansu ne'ebé halo hosi ajénsia franseza AFP.

Iha Portugal, mate ona ema na'in 1.871 hosi kazu infesaun sira ne'ebé konfirmadu hamutuk 64.596, haktuir hosi boletin foun hosi Diresaun-Jeral Saúde portugeza nian.

Moras ne'e transmiti hosi koronavírus foun ne'ebé hetan iha Wuhan, sidade ida iha sentru Xina, iha final Dezembru.

Hafoin Europa troka tiha Xina hanesan sentru pandemia nian iha Fevereiru, agora kontinente amerikanu maka hanesan fatin ne'ebé iha liu kazu konfirmadu sira ho vítima mortal barak.

Lusa

 


Comentários

Critério de publicação de comentários